ಶ್ರೀರಾಜರಾಜೇಶ್ವರೀ ಮನ್ತ್ರಮಾತೃಕಾಸ್ತವಃ

ಶ್ರೀರಾಜರಾಜೇಶ್ವರೀ ಮನ್ತ್ರಮಾತೃಕಾಸ್ತವಃ

ಓಂ ಶ್ರೀಗಣೇಶಾಯ ನಮಃ ।

ಕಲ್ಯಾಣಾಯುತಪೂರ್ಣಚನ್ದ್ರವದನಾಂ ಪ್ರಾಣೇಶ್ವರಾನನ್ದಿನೀಂ
ಪೂರ್ಣಾಂ ಪೂರ್ಣತರಾಂ ಪರೇಶಮಹಿಷೀಂ ಪೂರ್ಣಾಮೃತಾಸ್ವಾದಿನೀಮ್ ।
ಸಮ್ಪೂರ್ಣಾಂ ಪರಮೋತ್ತಮಾಮೃತಕಲಾಂ ವಿದ್ಯಾವತೀಂ ಭಾರತೀಂ
ಶ್ರೀಚಕ್ರಪ್ರಿಯಬಿನ್ದುತರ್ಪಣಪರಾಂ ಶ್ರೀರಾಜರಾಜೇಶ್ವರೀಮ್ ॥ 1॥

ಏಕಾರಾದಿಸಮಸ್ತವರ್ಣವಿವಿಧಾಕಾರೈಕಚಿದ್ರೂಪಿಣೀಂ
ಚೈತನ್ಯಾತ್ಮಕಚಕ್ರರಾಜನಿಲಯಾಂ ಚನ್ದ್ರಾನ್ತಸಂಚಾರಿಣೀಮ್ ।
ಭಾವಾಭಾವವಿಭಾವಿನೀಂ ಭವಪರಾಂ ಸದ್ಭಕ್ತಿಚಿನ್ತಾಮಣಿಂ
ಶ್ರೀಚಕ್ರಪ್ರಿಯಬಿನ್ದುತರ್ಪಣಪರಾಂ ಶ್ರೀರಾಜರಾಜೇಶ್ವರೀಮ್ ॥ 2॥

ಈಹಾಧಿಕ್ಪರಯೋಗಿವೃನ್ದವಿದಿತಾಂ ಸ್ವಾನನ್ದಭೂತಾಂ ಪರಾಂ  var  ಈಶಾಧೀಶ್ವರಯೋಗಿ
ಪಶ್ಯನ್ತೀಂ ತನುಮಧ್ಯಮಾಂ ವಿಲಸಿನೀಂ ಶ್ರೀವೈಖರೀರೂಪಿಣೀಮ್ ।
ಆತ್ಮಾನಾತ್ಮವಿಚಾರಿಣೀಂ ವಿವರಗಾಂ ವಿದ್ಯಾಂ ತ್ರಿಬೀಜಾತ್ಮಿಕಾಂ
ಶ್ರೀಚಕ್ರಪ್ರಿಯಬಿನ್ದುತರ್ಪಣಪರಾಂ ಶ್ರೀರಾಜರಾಜೇಶ್ವರೀಮ್ ॥ 3॥

ಲಕ್ಷ್ಯಾಲಕ್ಷ್ಯನಿರೀಕ್ಷಣಾಂ ನಿರೂಪಮಾಂ ರುದ್ರಾಕ್ಷಮಾಲಾಧರಾಂ
ತ್ರ್ಯಕ್ಷಾರ್ಧಾಕೃತಿದಕ್ಷವಂಶಕಲಿಕಾಂ ದೀರ್ಘಾಕ್ಷಿದೀರ್ಘಸ್ವರಾಮ್ ।
ಭದ್ರಾಂ ಭದ್ರವರಪ್ರದಾಂ ಭಗವತೀಂ ಭದ್ರೇಶ್ವರೀಂ ಮುದ್ರಿಣೀಂ
ಶ್ರೀಚಕ್ರಪ್ರಿಯಬಿನ್ದುತರ್ಪಣಪರಾಂ ಶ್ರೀರಾಜರಾಜೇಶ್ವರೀಮ್ ॥ 4॥

ಹ್ರೀಂಬೀಜಾಗತನಾದಬಿನ್ದುಭರಿತಾಮೋಂಕಾರನಾದಾತ್ಮಿಕಾಂ
ಬ್ರಹ್ಮಾನನ್ದಘನೋದರೀಂ ಗುಣವತೀಂ ಜ್ಞಾನೇಶ್ವರೀಂ ಜ್ಞಾನದಾಮ್ ।
ಜ್ಞಾನೇಚ್ಛಾಕೃತಿನೀಂ ಮಹೀಂ ಗತವತೀಂ ಗನ್ಧರ್ವಸಂಸೇವಿತಾಂ
ಶ್ರೀಚಕ್ರಪ್ರಿಯಬಿನ್ದುತರ್ಪಣಪರಾಂ ಶ್ರೀರಾಜರಾಜೇಶ್ವರೀಮ್ ॥ 5॥

ಹರ್ಷೋನ್ಮತ್ತಸುವರ್ಣಪಾತ್ರಭರಿತಾಂ ಪೀನೋನ್ನತಾಘೂರ್ಣಿತಾಂ (?)
ಹುಂಕಾರಪ್ರಿಯಶಬ್ದಜಾಲನಿರತಾಂ ಸಾರಸ್ವತೋಲ್ಲಾಸಿನೀಮ್ ।
ಸಾರಾಸಾರವಿಚಾರಚಾರುಚತುರಾಂ ವರ್ಣಾಶ್ರಮಾಕಾರಿಣೀಂ
ಶ್ರೀಚಕ್ರಪ್ರಿಯಬಿನ್ದುತರ್ಪಣಪರಾಂ ಶ್ರೀರಾಜರಾಜೇಶ್ವರೀಮ್ ॥ 6॥

ಸರ್ವೇಶಾಂಗವಿಹಾರಿಣೀಂ ಸಕರುಣಾಂ ಸನ್ನಾದಿನೀಂ ನಾದಿನೀಂ
ಸಂಯೋಗಪ್ರಿಯರೂಪಿಣೀಂ ಪ್ರಿಯವತೀಂ ಪ್ರೀತಾಂ ಪ್ರತಾಪೋನ್ನತಾಮ್ ।
ಸರ್ವಾನ್ತರ್ಗತಿಶಾಲಿನೀಂ ಶಿವತನೂಸನ್ದೀಪಿನೀಂ ದೀಪಿನೀಂ  var  ಸರ್ವಾನ್ತರಗತ
ಶ್ರೀಚಕ್ರಪ್ರಿಯಬಿನ್ದುತರ್ಪಣಪರಾಂ ಶ್ರೀರಾಜರಾಜೇಶ್ವರೀಮ್ ॥ 7॥

ಕರ್ಮಾಕರ್ಮವಿವರ್ಜಿತಾಂ ಕುಲವತೀಂ ಕರ್ಮಪ್ರದಾಂ ಕೌಲಿನೀಂ
ಕಾರುಣ್ಯಾಮ್ಬುಧಿಸರ್ವಕಾಮನಿರತಾಂ ಸಿನ್ಧುಪ್ರಿಯೋಲ್ಲಾಸಿನೀಮ್ ।
ಪಂಚಬ್ರಹ್ಮಸನಾತನಾಸನಗತಾಂ ಗೇಯಾಂ ಸುಯೋಗಾನ್ವಿತಾಂ
ಶ್ರೀಚಕ್ರಪ್ರಿಯಬಿನ್ದುತರ್ಪಣಪರಾಂ ಶ್ರೀರಾಜರಾಜೇಶ್ವರೀಮ್ ॥ 8॥

ಹಸ್ತ್ಯುತ್ಕುಮ್ಭನಿಭಸ್ತನದ್ವಿತಯತಃ ಪೀನೋನ್ನತಾದಾನತಾಂ
ಹಾರಾದ್ಯಾಭರಣಾಂ ಸುರೇನ್ದ್ರವಿನುತಾಂ ಶೃಂಗಾರಪೀಠಾಲಯಾಮ್ ।
ಯೋನ್ಯಾಕಾರಕಯೋನಿಮುದ್ರಿತಕರಾಂ ನಿತ್ಯಾಂ ನವಾರ್ಣಾತ್ಮಿಕಾಂ
ಶ್ರೀಚಕ್ರಪ್ರಿಯಬಿನ್ದುತರ್ಪಣಪರಾಂ ಶ್ರೀರಾಜರಾಜೇಶ್ವರೀಮ್ ॥ 9॥

ಲಕ್ಷ್ಮೀಲಕ್ಷಣಪೂರ್ಣಭಕ್ತವರದಾಂ ಲೀಲಾವಿನೋದಸ್ಥಿತಾಂ
ಲಾಕ್ಷಾರಂಚಿತಪಾದಪದ್ಮಯುಗಲಾಂ ಬ್ರಹ್ಮೇನ್ದ್ರಸಂಸೇವಿತಾಮ್ ।  var  ರಂಜಿತ
ಲೋಕಾಲೋಕಿತಲೋಕಕಾಮಜನನೀಂ ಲೋಕಾಶ್ರಯಾಂಕಸ್ಥಿತಾಂ
ಶ್ರೀಚಕ್ರಪ್ರಿಯಬಿನ್ದುತರ್ಪಣಪರಾಂ ಶ್ರೀರಾಜರಾಜೇಶ್ವರೀಮ್ ॥ 10॥

ಹ್ರೀಂಕಾರಾಶ್ರಿತಶಂಕರಪ್ರಿಯತನುಂ ಶ್ರೀಯೋಗಪೀಠೇಶ್ವರೀಂ
ಮಾಂಗಲ್ಯಾಯುತಪಂಕಜಾಭನಯನಾಂ ಮಾಂಗಲ್ಯಸಿದ್ಧಿಪ್ರದಾಮ್ ।
ತಾರುಣ್ಯೇನ ವಿಶೇಷಿತಾಂಗಸುಮಹಾಲಾವಣ್ಯಸಂಶೋಭಿತಾಂ
ಶ್ರೀಚಕ್ರಪ್ರಿಯಬಿನ್ದುತರ್ಪಣಪರಾಂ ಶ್ರೀರಾಜರಾಜೇಶ್ವರೀಮ್ ॥ 11॥

ಸರ್ವಜ್ಞಾನಕಲಾವತೀಂ ಸಕರುಣಾಂ ಸರ್ವೇಶ್ವರೀಂ ಸರ್ವಗಾಂ
ಸತ್ಯಾಂ ಸರ್ವಮಯೀಂ ಸಹಸ್ರದಲಜಾಂ ಸತ್ತ್ವಾರ್ಣವೋಪಸ್ಥಿತಾಮ್ ।
ಸಂಗಾಸಂಗವಿವರ್ಜಿತಾಂ ಸುಖಕರೀಂ ಬಾಲಾರ್ಕಕೋಟಿಪ್ರಭಾಂ
ಶ್ರೀಚಕ್ರಪ್ರಿಯಬಿನ್ದುತರ್ಪಣಪರಾಂ ಶ್ರೀರಾಜರಾಜೇಶ್ವರೀಮ್ ॥ 12॥

ಕಾದಿಕ್ಷಾನ್ತಸುವರ್ಣಬಿನ್ದುಸುತನುಂ ಸರ್ವಾಂಗಸಂಶೋಭಿತಾಂ
ನಾನಾವರ್ಣವಿಚಿತ್ರಚಿತ್ರಚರಿತಾಂ ಚಾತುರ್ಯಚಿನ್ತಾಮಣಿಮ್ ।
ಚಿತ್ತಾನನ್ದವಿಧಾಯಿನೀಂ ಸುಚಪಲಾಂ ಕೂಟತ್ರಯಾಕಾರಿಣೀಂ
ಶ್ರೀಚಕ್ರಪ್ರಿಯಬಿನ್ದುತರ್ಪಣಪರಾಂ ಶ್ರೀರಾಜರಾಜೇಶ್ವರೀಮ್ ॥ 13॥

ಲಕ್ಷ್ಮೀಶಾನವಿಧೀನ್ದ್ರಚನ್ದ್ರಮಕುಟಾದ್ಯಷ್ಟಾಂಗಪೀಠಾಶ್ರಿತಾಂ
ಸೂರ್ಯೇನ್ದ್ವಗ್ನಿಮಯೈಕಪೀಠನಿಲಯಾಂ ತ್ರಿಸ್ಥಾಂ ತ್ರಿಕೋಣೇಶ್ವರೀಮ್ ।
ಗೋಪ್ತ್ರೀಂ ಗರ್ವನಿಗರ್ವಿತಾಂ ಗಗನಗಾಂ ಗಂಗಾಗಣೇಶಪ್ರಿಯಾಂ
ಶ್ರೀಚಕ್ರಪ್ರಿಯಬಿನ್ದುತರ್ಪಣಪರಾಂ ಶ್ರೀರಾಜರಾಜೇಶ್ವರೀಮ್ ॥ 14॥

ಹ್ರೀಂಕೂಟತ್ರಯರೂಪಿಣೀಂ ಸಮಯಿನೀಂ ಸಂಸಾರಿಣೀಂ ಹಂಸಿನೀಂ
ವಾಮಾಚಾರಪರಾಯಣೀಂ ಸುಕುಲಜಾಂ ಬೀಜಾವತೀಂ ಮುದ್ರಿಣೀಮ್ ।  var  ವಾಮಾರಾಧ್ಯಪದಾಮ್ಬುಜಾಂ
ಕಾಮಾಕ್ಷೀಂ ಕರುಣಾರ್ದ್ರಚಿತ್ತಸಹಿತಾಂ ಶ್ರೀಂ ಶ್ರೀತ್ರಿಮೂರ್ತ್ಯಮ್ಬಿಕಾಂ
ಶ್ರೀಚಕ್ರಪ್ರಿಯಬಿನ್ದುತರ್ಪಣಪರಾಂ ಶ್ರೀರಾಜರಾಜೇಶ್ವರೀಮ್ ॥ 15॥

ಯಾ ವಿದ್ಯಾ ಶಿವಕೇಶವಾದಿಜನನೀ ಯಾ ವೈ ಜಗನ್ಮೋಹಿನೀ
ಯಾಬ್ರಹ್ಮಾದಿಪಿಪೀಲಿಕಾನ್ತಜಗದಾನನ್ದೈಕಸನ್ದಾಯಿನೀ ।
ಯಾ ಪಂಚಪ್ರಣವದ್ವಿರೇಫನಲಿನೀ ಯಾ ಚಿತ್ಕಲಾಮಾಲಿನೀ
ಸಾ ಪಾಯಾತ್ಪರದೇವತಾ ಭಗವತೀ ಶ್ರೀರಾಜರಾಜೇಶ್ವರೀ ॥ 16॥
ಇತಿ ಶ್ರೀಶಾಕ್ತಮತಸಿದ್ಧಾನ್ತಸಂಸ್ಥಾಪನವಾಮಾಚಾರಪರಮಾಚರ್ಯವರ್ಯ-
ವಾವದೂಕವಿದ್ವಚ್ಛಂಕರಾನನ್ದವಿರಾಜಿತಃ
           ಶ್ರೀರಾಜರಾಜೇಶ್ವರೀಮಾತೃಕಾಮನ್ತ್ರಸ್ತವಃ ಸಮ್ಪೂರ್ಣಃ ॥