ರಾಜರಾಜೇಶ್ವರೀಸ್ತವಃ

ರಾಜರಾಜೇಶ್ವರೀಸ್ತವಃ

ತ್ಯಾಗರಾಜವಿರಚಿತಃ

ಯಾ ತ್ರೈಲೋಕ್ಯಕುಟುಮ್ಬಿಕಾ ವರಸುಧಾಧಾರಾಭಿಸಂತರ್ಪಿಣೀ

ಭೂಮ್ಯಾದೀನ್ದ್ರಿಯಚಿತ್ತಚೇತನಪರಾ ಸಂವಿನ್ಮಯೀ ಶಾಶ್ವತೀ ।

ಬ್ರಹ್ಮೇನ್ದ್ರಾಚ್ಯುತವನ್ದಿತೇಶಮಹಿಷೀ ವಿಜ್ಞಾನದಾತ್ರೀ ಸತಾಂ

ತಾಂ ವನ್ದೇ ಹೃದಯತ್ರಿಕೋಣನಿಲಯಾಂ ಶ್ರೀರಾಜರಾಜೇಶ್ವರೀಮ್ ॥ 1॥

ಯಾಂ ವಿದ್ಯೇತಿ ವದನ್ತಿ ಶುದ್ಧಮತಯೋ ವಾಚಾಂ ಪರಾಂ ದೇವತಾಂ

ಷಟ್ಚಕ್ರಾನ್ತನಿವಾಸಿನೀಂ ಕುಲಪಥಪ್ರೋತ್ಸಾಹಸಂವರ್ಧಿನೀಮ್ ।

ಶ್ರೀಚಕ್ರಾಂಕಿತರೂಪಿಣೀಂ ಸುರಮಣೇರ್ವಾಮಾಂಕಸಂಶೋಭಿನೀಂ

ತಾಂ ವನ್ದೇ ಹೃದಯತ್ರಿಕೋಣನಿಲಯಾಂ ಶ್ರೀರಾಜರಾಜೇಶ್ವರೀಮ್ ॥ 2॥

ಯಾ ಸರ್ವೇಶ್ವರನಾಯಿಕೇತಿ ಲಲಿತೇತ್ಯಾನನ್ದಸೀಮೇಶ್ವರೀ-

ತ್ಯಮ್ಬೇತಿ ತ್ರಿಪುರೇಶ್ವರೀತಿ ವಚಸಾಂ ವಾಗ್ವಾದಿನೀತ್ಯನ್ನದಾ ।

ಇತ್ಯೇವಂ ಪ್ರವದನ್ತಿ ಸಾಧುಮತಯಃ ಸ್ವಾನನ್ದಬೋಧೋಜ್ಜ್ವಲಾಃ

ತಾಂ ವನ್ದೇ ಹೃದಯತ್ರಿಕೋಣನಿಲಯಾಂ ಶ್ರೀರಾಜರಾಜೇಶ್ವರೀಮ್ ॥ 3॥

ಯಾ ಪ್ರಾತಃ ಶಿಖಿಮಂಡಲೇ ಮುನಿಜನೈರ್ಗೌರೀ ಸಮಾರಾಧ್ಯತೇ

ಯಾ ಮಧ್ಯೇ ದಿವಸಸ್ಯ ಭಾನುರುಚಿರಾ ಚಂಡಾಂಶುಮಧ್ಯೇ ಪರಮ್ ।

ಯಾ ಸಾಯಂ ಶಶಿರೂಪಿಣೀ ಹಿಮರುಚೇರ್ಮಧ್ಯೇ ತ್ರಿಸಂಧ್ಯಾತ್ಮಿಕಾ

ತಾಂ ವನ್ದೇ ಹೃದಯತ್ರಿಕೋಣನಿಲಯಾಂ ಶ್ರೀರಾಜರಾಜೇಶ್ವರೀಮ್ ॥ 4॥

ಯಾ ಮೂಲೋತ್ಥಿತನಾದಸಂತತಿಲವೈಃ ಸಂಸ್ತೂಯತೇ ಯೋಗಿಭಿಃ

ಯಾ ಪೂರ್ಣೇನ್ದುಕಲಾಮೃತೈಃ ಕುಲಪಥೇ ಸಂಸಿಚ್ಯತೇ ಸಂತತಮ್ ।

ಯಾ ಬನ್ಧತ್ರಯಕುಮ್ಭಿತೋನ್ಮನಿಪಥೇ ಸಿದ್ಧ್ಯಷ್ಟಕೇನೇಡ್ಯತೇ

ತಾಂ ವನ್ದೇ ಹೃದಯತ್ರಿಕೋಣನಿಲಯಾಂ ಶ್ರೀರಾಜರಾಜೇಶ್ವರೀಮ್ ॥ 5॥

ಯಾ ಮೂಕಸ್ಯ ಕವಿತ್ವವರ್ಷಣಸುಧಾಕಾದಮ್ಬಿನೀ ಶ್ರೀಕರೀ

ಯಾ ಲಕ್ಷ್ಮೀತನಯಸ್ಯ ಜೀವನಕರೀ ಸಂಜೀವಿನೀವಿದ್ಯಯಾ ।

ಯಾ ದ್ರೋಣೀಪುರನಾಯಿಕಾ ದ್ವಿಜಶಿಶೋಃ ಸ್ತನ್ಯಪ್ರದಾತ್ರೀ ಮುದಾ

ತಾಂ ವನ್ದೇ ಹೃದಯತ್ರಿಕೋಣನಿಲಯಾಂ ಶ್ರೀರಾಜರಾಜೇಶ್ವರೀಮ್ ॥ 6॥

ಯಾ ವಿಶ್ವಪ್ರಭವಾದಿಕಾರ್ಯಜನನೀ ಬ್ರಹ್ಮಾದಿಮೂರ್ತ್ಯಾತ್ಮನಾ

ಯಾ ಚನ್ದ್ರಾರ್ಕಶಿಖಿಪ್ರಭಾಸನಕರೀ ಸ್ವಾತ್ಮಪ್ರಭಾಸತ್ತಯಾ ।

ಯಾ ಸತ್ತ್ವಾದಿಗುಣತ್ರಯೇಷು ಸಮತಾಸಂವಿತ್ಪ್ರದಾತ್ರೀ ಸತಾಂ

ತಾಂ ವನ್ದೇ ಹೃದಯತ್ರಿಕೋಣನಿಲಯಾಂ ಶ್ರೀರಾಜರಾಜೇಶ್ವರೀಮ್ ॥ 7॥

ಯಾ ಕ್ಷಿತ್ಯನ್ತಶಿವಾದಿತತ್ತ್ವವಿಲಸತ್ಸ್ಫೂರ್ತಿಸ್ವರೂಪಾ ಪರಂ

ಯಾ ಬ್ರಹ್ಮಾಣ್ದಕಟಾಹಭಾರನಿವಹನ್ಮಂಡೂಕವಿಶ್ವಮ್ಭರೀ ।

ಯಾ ವಿಶ್ವಂ ನಿಖಿಲಂ ಚರಾಚರಮಯಂ ವ್ಯಾಪ್ಯ ಸ್ಥಿತಾ ಸಂತತಂ

ತಾಂ ವನ್ದೇ ಹೃದಯತ್ರಿಕೋಣನಿಲಯಾಂ ಶ್ರೀರಾಜರಾಜೇಶ್ವರೀಮ್ ॥ 8॥

ಯಾ ವರ್ಗಾಷ್ಟಕವರ್ಣಪಂಜರಶುಕೀ ವಿದ್ಯಾಕ್ಷರಾಲಾಪಿನೀ

ನಿತ್ಯಾನನ್ದಪಯೋಽನುಮೋದನಕರೀ ಶ್ಯಾಮಾ ಮನೋಹಾರಿಣೀ ।

ಸತ್ಯಾನನ್ದಚಿದೀಶ್ವರಪ್ರಣಯಿನೀ ಸ್ವರ್ಗಾಪವರ್ಗಪ್ರದಾ

ತಾಂ ವನ್ದೇ ಹೃದಯತ್ರಿಕೋಣನಿಲಯಾಂ ಶ್ರೀರಾಜರಾಜೇಶ್ವರೀಮ್ ॥ 9॥

ಯಾ ಶ್ರುತ್ಯನ್ತಸುಶುಕ್ತಿಸಮ್ಪುಟಮಹಾಮುಕ್ತಾಫಲಂ ಸಾತ್ತ್ವಿಕಂ

ಸಚ್ಚಿತ್ಸೌಖ್ಯಪಯೋದವೃಷ್ಟಿಫಲಿತಂ ಸರ್ವಾತ್ಮನಾ ಸುನ್ದರಮ್ ।

ನಿರ್ಮೂಲ್ಯಂ ನಿಖಿಲಾರ್ಥದಂ ನಿರುಪಮಾಕಾರಂ ಭವಾಹ್ಲಾದದಂ

ತಾಂ ವನ್ದೇ ಹೃದಯತ್ರಿಕೋಣನಿಲಯಾಂ ಶ್ರೀರಾಜರಾಜೇಶ್ವರೀಮ್ ॥ 10॥

ಯಾ ನಿತ್ಯಾವ್ರತಮಂಡಲಸ್ತುತಪದಾ ನಿತ್ಯಾರ್ಚನಾತತ್ಪರಾ

ನಿತ್ಯಾನಿತ್ಯವಿಮರ್ಶಿನೀ ಕುಲಗುರೋರ್ವಾವಯಪ್ರಕಾಶಾತ್ಮಿಕಾ ।

ಕೃತ್ಯಾಕೃತ್ಯಮತಿಪ್ರಭೇದಶಮನೀ ಕಾತ್ಸ್ನರ್ಯಾತ್ಮಲಾಭಪ್ರದಾ

ತಾಂ ವನ್ದೇ ಹೃದಯತ್ರಿಕೋಣನಿಲಯಾಂ ಶ್ರೀರಾಜರಾಜೇಶ್ವರೀಮ್ ॥ 11॥

ಯಾಮುದ್ದಿಶ್ಯ ಯಜನ್ತಿ ಶುದ್ಧಮತಯೋ ನಿತ್ಯಂ ಪರಾಗ್ನೌ ಸ್ರುಚಾ

ಮತ್ಯಾ ಪ್ರಾಣಘೃತಪ್ಲುತೇನ್ದ್ರಿಯಚರುದ್ರವ್ಯೈಃ ಸಮನ್ತ್ರಾಕ್ಷರೈಃ ।

ಯತ್ಪಾದಾಮ್ಬುಜಭಕ್ತಿದಾರ್ಢ್ಯಸುರಸಪ್ರಾಪ್ತ್ಯೈ ಬುಧಾಃ ಸಂತತಂ

ತಾಂ ವನ್ದೇ ಹೃದಯತ್ರಿಕೋಣನಿಲಯಾಂ ಶ್ರೀರಾಜರಾಜೇಶ್ವರೀಮ್ ॥ 12॥

ಯಾ ಸಂವಿನ್ಮಕರನ್ದಪುಷ್ಪಲತಿಕಾಸ್ವಾನನ್ದದೇಶೋತ್ಥಿತಾ

ಸತ್ಸಂತಾನಸುವೇಷ್ಟನಾತಿರುಚಿರಾ ಶ್ರೇಯಃಫಲಂ ತನ್ವತೀ ।

ನಿರ್ಧೂತಾಖಿಲವೃತ್ತಿಭಕ್ತಧಿಷಣಾಭೃಂಗಾಂಗನಾಸೇವಿತಾ

ತಾಂ ವನ್ದೇ ಹೃದಯತ್ರಿಕೋಣನಿಲಯಾಂ ಶ್ರೀರಾಜರಾಜೇಶ್ವರೀಮ್ ॥ 13॥

ಯಾಮಾರಾಧ್ಯ ಮುನಿರ್ಭವಾಬ್ಧಿಮತರತ್ ಕ್ಲೇಶೋರ್ಮಿಜಾಲಾವೃತಂ

ಯಾಂ ಧ್ಯಾತ್ವಾ ನ ನಿವರ್ತತೇ ಶಿವಪದಾನನ್ದಾಬ್ಧಿಮಗ್ನಃ ಪರಮ್ ।

ಯಾಂ ಸ್ಮೃತ್ವಾ ಸ್ವಪದೈಕಬೋಧಮಯತೇ ಸ್ಥೂಲೇಽಪಿ ದೇಹೇ ಜನಃ

ತಾಂ ವನ್ದೇ ಹೃದಯತ್ರಿಕೋಣನಿಲಯಾಂ ಶ್ರೀರಾಜರಾಜೇಶ್ವರೀಮ್ ॥ 14॥

ಯಾಪಾಷಾಂಕುಶಚಾಪಸಾಯಕಕರಾ ಚನ್ದ್ರಾರ್ಧಚೂಡಾಲಸತ್

ಕಾಂಚೀದಾಮವಿಭೂಷಿತಾ ಸ್ಮಿತಮುಖೀ ಮನ್ದಾರಮಾಲಾಧರಾ ।

ನೀಲೇನ್ದೀವರಲೋಚನಾ ಶುಭಕರೀ ತ್ಯಾಗಾಧಿರಾಜೇಶ್ವರೀ

ತಾಂ ವನ್ದೇ ಹೃದಯತ್ರಿಕೋಣನಿಲಯಾಂ ಶ್ರೀರಾಜರಾಜೇಶ್ವರೀಮ್ ॥ 15॥

ಯಾ ಭಕ್ತೇಷು ದದಾತಿ ಸಂತತಸುಖಂ ವಾಣೀಂ ಚ ಲಕ್ಷ್ಮೀಂ ತಥಾ

ಸೌನ್ದರ್ಯಂ ನಿಗಮಾಗಮಾರ್ಥಕವಿತಾಂ ಸತ್ಪುತ್ರಸಮ್ಪತ್ಸುಖಮ್ ।

ಸತ್ಸಂಗಂ ಸುಕಲತ್ರತಾಂ ಸುವಿನಯಂ ಸಯುಜ್ಯಮುಕ್ತಿಂ ಪರಾಂ

ತಾಂ ವನ್ದೇ ಹೃದಯತ್ರಿಕೋಣನಿಲಯಾಂ ಶ್ರೀರಾಜರಾಜೇಶ್ವರೀಮ್ ॥ 16॥

ಇತ್ಯಾನನ್ದನಾಥಪಾದಪಪದ್ಮೋಪಜೀವಿನಾ ಕಾಶ್ಯಪಗೋತ್ರೋತ್ಪನ್ನೇನಾನ್ಧ್ರೇಣ

ತ್ಯಾಗರಾಜನಾಮ್ನಾ ವಿರಚಿತಃ ಶ್ರೀರಾಜರಾಜೇಶ್ವರೀಸ್ತವಃ ಸಮ್ಪೂರ್ಣಃ ॥